Ads by Google

ഹൃദയരക്തത്തില്‍ ചാലിച്ച തൂലിക

അശ്വതി എം.എ

meera k.r.

അക്ഷരനഗരിയുടെ പുണ്യം, കെ.ആര്‍ മീര.എഴുത്തിന്റെ വഴിയിലെ വേറിട്ട വ്യക്തിത്വം.കഥയെഴുത്തിന്റെ 14 വര്‍ഷങ്ങള്‍ പിന്നിടുമ്പോള്‍ വയലാര്‍ അവാര്‍ഡും കേരള സാഹിത്യ അക്കാദമി അവാര്‍ഡുമടക്കമുള്ള പ്രധാനപ്പെട്ട എല്ലാ പുരസ്‌ക്കാരങ്ങള്‍ക്കും പുറമേ ഒടുവിലിതാ കേന്ദ്രസാഹിത്യ അക്കാദമി അവാര്‍ഡും മീരയെ തേടിയെത്തിയിരിക്കുന്നു. നേത്രോന്മീലനത്തിനും മീരാസാധുവിനും ശേഷം വ്യത്യസ്തമായൊരു വായനാനുഭവം സമ്മാനിക്കുകയാണ് കെ.ആര്‍ മീരയുടെ ആരാച്ചാര്‍. കൊല്‍ക്കത്തയുടെ പശ്ചാത്തലത്തില്‍ മീര നെയ്‌തെടുത്തത് ഒരു പെണ്‍ ആരാച്ചാരുടെ സ്വപ്‌നങ്ങളാണ്. മലയാളിയുടെ ഭാവുകത്വത്തില്‍ പുതിയൊരു പാത വെട്ടിത്തുറന്ന ആരാച്ചാര്‍ ഓരോ വാക്യത്തിലും വാക്കുകളിലും വായനക്കാരെ മുള്‍മുനയില്‍ നിര്‍ത്തുന്നു. ആരാച്ചാര്‍ നോവല്‍ ഇംഗ്ലീഷിലേക്ക് പരിഭാഷപ്പെടുത്തിയിരിക്കുന്നത് ജെ.ദേവികയാണ്. ഹാങ്ങ് വുമണ്‍ എന്ന ഈ നോവല്‍ സൗത്ത് ഏഷ്യന്‍ സാഹിത്യകാരന്‍മാരുടെ രചനകള്‍ക്ക് നല്‍കുന്ന ഡി.എസ്.സി പുരസ്‌കാരത്തിന്റെ അന്തിമ പട്ടികയില്‍ ഇടം പിടിച്ചതും ഇരട്ടിമധുരം നല്‍കുന്നു.

ബംഗാളിന്റെ സംസ്‌കാരത്തില്‍ നിന്നുകൊണ്ട് മലയാളി എഴുതിയതായിട്ടും ആരാച്ചാര്‍ക്ക് കേന്ദ്ര അംഗീകാരം. എന്തു തോന്നുന്നു?
സന്തോഷമുണ്ട്. ബംഗാളി നോവലുകള്‍ വായിച്ചു വളര്‍ന്ന പല മലയാളി തലമുറകള്‍ക്കു വേണ്ടി ബംഗാളിനു മലയാളം സമ്മാനിച്ച നോവലാണ് ആരാച്ചാര്‍ എന്നു പലരും പറഞ്ഞു കേട്ടിട്ടുണ്ട്. എഴുതുമ്പോള്‍ മനസ്സില്‍ അതുണ്ടായിരുന്നില്ലെങ്കിലും എന്റെ ശ്രമത്തിന് അങ്ങനെയും ഒരു അര്‍ത്ഥമുണ്ടാകുന്നതില്‍ സന്തോഷം.

വളര്‍ന്നുവരുന്ന അസഹിഷ്ണുതയില്‍ പ്രതിഷേധിച്ച് എഴുത്തുകാര്‍ പുരസ്‌കാരങ്ങള്‍ തിരിച്ചു നല്‍കുന്നതിനോട് യോജിക്കുന്നുണ്ടോ? അസഹിഷ്ണുതക്കെതിരായ പോരാട്ടത്തില്‍ അവാര്‍ഡുകള്‍ ആയുധമാക്കുന്നതെങ്ങനെ?

അവാര്‍ഡുകള്‍ തിരിച്ചു നല്‍കുന്നത് താത്വികമായ തലത്തില്‍ ഫലപ്രദമായ പ്രതിഷേധ മാര്‍ഗം തന്നെയാണ്. ജനാധിപത്യം തകര്‍ക്കപ്പെടുന്നു എന്നു തോന്നുന്ന ഘട്ടങ്ങളില്‍ ശബ്ദമുയര്‍ത്താനും ആ ശബ്ദം അതു കേള്‍ക്കേണ്ടവരുടെ കാതുകളില്‍ എത്തുന്നു എന്നുറപ്പു വരുത്താനും ഇത്തരം ചില പ്രതീകാത്മക പ്രതിഷേധങ്ങള്‍ വേണ്ടി വരും. ഡോ. കാല്‍ബുര്‍ഗിയെപ്പോലെ വയോധികരായ പണ്ഡിതര്‍ കൊല്ലപ്പെട്ട സാഹചര്യത്തില്‍ അതു കാലഘട്ടത്തിന്റെ ആവശ്യമായിത്തീരുന്നു. മുപ്പത്തഞ്ചോളം എഴുത്തുകാര്‍ അവാര്‍ഡുകള്‍ തിരിച്ചു നല്‍കിയതു രാജ്യത്തെ അസഹിഷ്ണുതയില്‍ പ്രതിഷേധംഅലയടിക്കുന്നുണ്ട് എന്നു ഭരണകൂടത്തെ ബോദ്ധ്യപ്പെടുത്താന്‍ ഉപകരിച്ചു. അഹിംസാ മാര്‍ഗ്ഗത്തിലുള്ള പ്രതിഷേധമായി അതിനെ കാണാം.

പക്ഷേ, ഗവണ്‍മെന്റ് നേരിട്ടു നല്‍കുന്ന അവാര്‍ഡ് അല്ലാത്തതിനാലും അവാര്‍ഡ് നല്‍കപ്പെടുന്നതു എഴുത്തുകാര്‍ക്കല്ല, മറിച്ച് കൃതികള്‍ക്കാണ് എന്നതിനാലും അവാര്‍ഡുകള്‍ തിരിച്ചു നല്‍കുന്നതു രേഖഖപ്പെടുത്താന്‍ സംവിധാനമില്ലാത്തതിനാലും ഒരിക്കല്‍ ഏറ്റുവാങ്ങിയ അവാര്‍ഡുകള്‍ റദ്ദാക്കപ്പെടാത്തതിനാലും ഈ പ്രതിഷേധരീതിക്കു പ്രായോഗിക തലത്തില്‍ ഒരു അര്‍ഥമില്ലായ്മയുണ്ട്. അവാര്‍ഡ് തിരിച്ചു നല്‍കുന്നതു മാത്രമല്ല, പ്രതിഷേധം. അതു കൊണ്ടാണ് ഭരണകൂട ഭീകരതയെ ഏറ്റവും കൂടുതല്‍ വിമര്‍ശിക്കുന്ന കെ. സച്ചിദാനന്ദന്‍, ആനന്ദ് തുടങ്ങിയ സീനിയര്‍ എഴുത്തുകാര്‍ പോലും അവാര്‍ഡുകള്‍ തിരിച്ചു നല്‍കാത്തത്. എഴുത്തുകാര്‍ അവാര്‍ഡ് തിരിച്ചു കൊടുത്ത സമയത്ത് എന്നോട് അഭിപ്രായം ചോദിച്ച ഇന്ത്യന്‍ എക്‌സ്പ്രസ് പോലെയുള്ള മാധ്യമങ്ങളില്‍ അവാര്‍ഡ് തിരിച്ചു കൊടുക്കുന്നതു മാത്രമല്ല പ്രതിഷേധം എന്ന എന്റെ അഭിപ്രായം വ്യക്തമായി പ്രസിദ്ധീകരിക്കപ്പെട്ടതാണ്. അവാര്‍ഡ് സ്വീകരിക്കുന്നതു കൊണ്ടു പ്രതിഷേധം ഇല്ലാതാകുന്നില്ല. കാരണം അവാര്‍ഡ് നോവലിനുള്ളതാണ്. മാത്രമല്ല, അതിന് ആ നോവല്‍ തിരഞ്ഞെടുത്ത ജൂറിയിലെ അംഗങ്ങള്‍ ജീവിതകാലമത്രയും മതേതരത്വത്തിനും ജനാധിപത്യത്തിനും വേണ്ടി നിലകൊണ്ടിട്ടുള്ളവരുമാണ്.

മീരയുടെ കഥകള്‍ പലപ്പോഴും അമൂര്‍ത്തവും ധ്വന്യാത്മകവുമാണ് .എന്നാല്‍ ആരാച്ചാര്‍ റിയലിസ്റ്റിക്കും?

ആവേ മരിയയുടെയും ഗില്ലറ്റിന്റെയും തുടര്‍ച്ചയാണ് ആരാച്ചാര്‍ എന്നാണ് എന്റെ കഥകള്‍ സൂക്ഷ്മമായി പിന്തുടരുന്ന വായനക്കാര്‍ അഭിപ്രായപ്പെട്ടിട്ടുള്ളത്. അല്ലെങ്കില്‍ത്തന്നെ, ഒരു പ്രത്യേക രചന എന്തുകൊണ്ട് അങ്ങനെയായി എന്നുചോദിച്ചാല്‍ ഉത്തരമില്ല. ആദ്യ കൃതികളില്‍ തകര്‍ന്ന നായര്‍ തറവാടുകളെക്കുറിച്ചെഴുതിയ എം.ടി. വാസുദേവന്‍നായര്‍ പിന്നീടെന്തുകൊണ്ട് മഞ്ഞ് എഴുതി? അതു കഴിഞ്ഞ് രണ്ടാമൂഴം എഴുതി? കവിതകള്‍ മാത്രമെഴുതിയിരുന്ന റഫീക്കഖ് അഹമ്മദ് എന്തുകൊണ്ട് നോവല്‍ എഴുതി?

അറിയാത്ത ദേശത്തിന്റെ, അറിയാത്ത ഭാഷയിലെ ജീവിതം പകര്‍ത്തുമ്പോള്‍ നേരിട്ട വെല്ലുവിളികള്‍ എന്തൊക്കെയാണ്? ആഖ്യാനത്തിന് ബംഗാളി ഭാഷ വെല്ലുവിളിയായിരുന്നോ?

ചേതനയുടെ ഓരോ ചലനവും എന്നെ സംബന്ധിച്ചിടത്തോളം വെല്ലുവിളിയായിരുന്നു. അവള്‍ നടക്കുന്നതെങ്ങനെ, ഇരിക്കുന്നതെങ്ങനെ, വസ്ത്രം ധരിക്കുന്നതെങ്ങനെ, ഭക്ഷണം കഴിക്കാന്‍ ഇരിക്കുന്നതെങ്ങനെ... നോവലെഴുതാന്‍വേണ്ടി രണ്ടു തവണയായി പത്തിരുപതു ദിവസത്തിലേറെ കൊല്‍ക്കൊത്തയില്‍ ചുറ്റി നടന്നു. പിന്നീടു പുസ്തകങ്ങളിലൂടെയും ഇന്റര്‍നെറ്റിലൂടെയുമാണു ഞാന്‍ ബംഗാളിനെ കൂടുതലറിഞ്ഞത്. സംശയം തോന്നുമ്പോഴൊക്കെ ബംഗാളി സിനിമകള്‍ ഇട്ടു കണ്ടു. ദ ടെലിഗ്രാഫ് ഉള്‍പ്പെടെ ബംഗാളിഖ ദിനപത്രങ്ങളുടെ തൊണ്ണൂറുകള്‍ മുതലുള്ള ഓരോ പേജിലെയും ഓരോ വാര്‍ത്തയും പരിശോധിച്ചു. രബീന്ദ്രഗീതങ്ങളുടെ പരിഭാഷ കണ്ടെത്തി. എഴുത്തിനിടയില്‍, ബംഗാളി അറിഞ്ഞിരുന്നെങ്കില്‍ എന്ന് ആഗ്രഹിച്ചിട്ടുണ്ട്. ബംഗാളി അറിയാത്തതും നന്നായി. അറിഞ്ഞിരുന്നെങ്കില്‍ ചുരുങ്ങിയസമയത്തിനുള്ളില്‍ അതെഴുതിത്തീര്‍ക്കാന്‍ എനിക്കു കഴിയാതെ പോയേനെ.

ശേഷം അടുത്തപേജില്‍

Advertisement
ഉത്തമ പങ്കാളിയെ തിരഞ്ഞെടുക്കാൻ കേരള മാട്രിമോണിയിൽ, രജിസ്ട്രേഷൻ സൗജന്യം!
Ads by Google

നിങ്ങളുടെ അഭിപ്രായങ്ങള്‍
ഇവിടെ കൊടുക്കുന്ന അഭിപ്രായങ്ങള്‍ മംഗളത്തിന്റെ അഭിപ്രായമാവണമെന്നില്ല.

PLEASE NOTE
അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക. അഭിപ്രായങ്ങള്‍ മലയാളത്തിലോ ഇംഗ്ലീഷിലോ എഴുതുക. മംഗ്ലീഷില്‍ എഴുതുന്ന അഭിപ്രായങ്ങള്‍ പോസ്റ്റ് ചെയ്യുന്നതല്ല. ഇംഗ്ലീഷില്‍ ടൈപ് ചെയ്ത് മലയാളമാക്കാനുള്ള സംവിധാനം ഏര്‍പ്പെടുത്തിയിട്ടുണ്ട് ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക

Ads by Google
  • mangalam malayalam online newspaper

    ആതുരസേവനരംഗത്തെ ദൈവസാന്നിദ്ധ്യം

    അക്യുപങ്‌ചര്‍ ചികിത്സാരീതിയില്‍ തന്റേതായ വ്യക്‌തിമുദ്രപതിപ്പിച്ച ഡോക്‌ടര്‍ സിസ്‌റ്റര്‍ സോണിയ കന്യകയ്‌ക്കൊപ്പം.. ആതുരസേവനരംഗത്ത്‌ അക്യുപങ്‌ചറെന്ന...

  • mangalam malayalam online newspaper

    കഥകളിയിലെ സ്‌ത്രീത്വഭാവങ്ങള്‍

    സ്‌ത്രീവേഷവും പുരുഷവേഷവും ഒപ്പം ചെയ്‌ത്‌ കഥകളിയെന്ന കലയില്‍ തങ്ങളുടേതായ വ്യക്‌തിമുദ്ര പതിപ്പിച്ചവര്‍. കഥകളിയില്‍ ശോഭിക്കാന്‍ സ്‌ത്രീകള്‍ക്കും...

  • Rajesh Pillai

    ഹൃദയത്തില്‍ സൂക്ഷിക്കാന്‍ ഒരായിരം ഓര്‍മ്മകള്‍

    മലയാള സിനിമാ ചരിത്രത്തില്‍ പുതിയൊരു ചലച്ചിത്ര ആഖ്യാന രീതി കൊണ്ടുവന്ന വ്യക്‌തിയാണ്‌ മണ്‍മറഞ്ഞുപോയ ചലച്ചിത്ര സംവിധായകന്‍ രാജേഷ്‌പിള്ള. ട്രാഫിക്‌...

Back to Top